Studentë dhe kërkues shkencorë të Fakultetit të Shkencave Shoqërore dhe Fakultetit të Shkencave të Aplikuara dhe Ekonomike, në kuadër të infrastrukturës kërkimore RESILIENCE në të cilën “Albanian University” është partner, zhvilluan sot, 15 nëntor 2022, një vizitë në ambjentet e Kryegjyshatës Botërore Bektashiane; muzeun e bektashizmit, arkivën, bibliotekën, fototekën dhe ambiente të tjera në Selinë e Shenjtë.
Gjatë kësaj vizite, studentët u pritën edhe nga Kryegjyshi Botëror Bektashian, Shenjtëria e Tij, Haxhi Dede Edmond Brahimaj, ku edhe i shoqëroi të pranishmit duke i njohur më shumë me historinë e Bektashizmit përmes veprave të ruajtura në muze dhe në bibliotekë.
Studentët shprehën interes për kulturën dhe historinë bektashiane duke i drejtuar Kryegjyshit Botëror edhe një sërë pyetjesh lidhur me to.
Kryegjyshata Botërore Bektashiane është një partner i rëndësishëm i “Albanian University” në kuadër të infrastrukturës kërkimore RESILIENCE, duke mundësuar pasurimin e studentëve dhe kërkuesve shkencorë me informacione në drejtim të historisë, artit dhe kulturës së këtij komuniteti. Pasurim ky që vazhdon dhe thellohet aktivitet pas aktiviteti, i organizuar me një bashkëpunim të ndërsjelltë.
