Gjatë vizitës disa ditore në Bruksel, me ftesë të Parlamentit Europian, Kryegjyshi Botëror i Bektashinjve, Shenjtëria e Tij, Haxhi Dede Baba, Edmond Brahimaj, mori pjesë edhe në tryezën e përbashkët për dialogin fetar, të drejtuar nga Zëvendëspresidentja e Parlamentit Europian, znj. Antonella Sberna.
Pjesë e kësaj tryeze ishin edhe Komisioneri Europian përgjegjës për fenë, Presidentja e Parlamentit Europian si dhe anëtarë të tjerë të Parlamentit Europian.
Në fjalën e Tij të rastit, Kryegjyshi Botëror ndër të tjera u ndal tek vlerat dhe harmonia fetare, ku shembulli i Shqipërisë si një vend ku liria dhe bashkëjetesa fetare është një model jetese, si dhe te projekti për të promovuar më tej rolin e Shqipërisë, si qendër e rëndësishme për turizmin ndërfetar.
Përshëndetja e Kryegjyshit Botëror, Dede Edmond Brahimaj.
“I nderuar Komisioner Magnus Brunner,
E nderuar Znj. Presidente e Parlamentit Evropian Roberta Metsola,
E nderuar Zv. Presidente e Parlamentit Evropian Antonella Sberna, të nderuar përfaqësues të institucioneve të BE e të nderuar përfaqësues të feve,
Më lejoni fillimisht të shpreh mirënjohjen time për folësit e këtij paneli për perspektivat e tyre ndriçuese dhe dialogun e thelluar. Është përmes shkëmbimeve të tilla bashkëpunuese që afrohemi më shumë drejt thelbit të promovimit të kohezionit shoqëror dhe përqafimit të shumëllojshmërisë kulturore në komunitetet tona.
Arsimi, angazhimi i të rinjve dhe shkëmbimet kulturore janë themeli i kësaj misioni. Ato janë ura që lidhin breza, tradita dhe besime. Duke fuqizuar të rinjtë tanë përmes arsimit dhe krijimit të hapësirave gjithëpërfshirëse për turizmin ndërfetar, jo vetëm që festojmë diversitetin, por gjithashtu pajisim komunitetet tona për të kundërshtuar forcat ndarëse me unitet dhe mirëkuptim.
Shpreh falënderimet e mia të sinqerta për të gjithë folësit e mëparshëm për kontributet e tyre të vyera. Ndjehemi të nderuar që jemi pjesë e këtij dialogu thelbësor, të udhëhequr nga vlerat e njerëzimit, shërbimit dhe vëllazërisë – parime që janë në zemër të Bektashizmit dhe frymës evropiane.
Që prej përzënies së komunitetit tonë me dekretin e Ataturkut, i cili e zhvendosi Selinë Botërore Bektashiane në Tiranë, kemi bartur trashëgiminë tonë përpara, shpesh në rrethana të vështira. Për gati një shekull, jemi përpjekur të ruajmë një mesazh dashurie dhe përfshirjeje, duke sfiduar interpretimet e ngurta dhe duke promovuar harmoninë. Këto vlera, të rrënjosura në karakter dhe njerëzim, e jo në rregulla të rrepta apo paraqitje të jashtme, na kanë bërë të keqkuptuar nga disa – por të palëkundur në misionin tonë.
Sot, duhet të përballemi me një valë në rritje ekstremizmi, veçanërisht në Ballkanin Perëndimor, të nxitur nga Islami politik dhe taktikat e fshehta të fuqive gjeopolitike. Këto ndikime depërtojnë në demokraci, kulturë dhe shoqëri, duke minuar vlerat që ne çmojmë. Kostoja e kësaj lufte bie përfundimisht mbi Evropën dhe aleatët e saj transatlantikë. Azia Qendrore, Lindja e Mesme dhe rajoni ynë mbajnë peshën e këtyre sfidave.
Besojmë se është detyra jonë e shenjtë për të adresuar këtë kërcënim – për të parandaluar ndërlikimin e politikës dhe fesë dhe për të kundërshtuar agjendat radikale. Për të pasur sukses, duhet të bashkohemi: të krishterë, ortodoksë, bektashinj dhe të gjitha pakicat evropiane, duke u rreshtuar nën një strategji të përbashkët të mirëkuptimit ndërfetar.
Në përpjekjet tona, kemi zhvilluar një strategji të fokusuar në turizmin ndërfetar evropian, një mjet i fuqishëm për të festuar shumëllojshmërinë kulturore, për të promovuar artet dhe zejet, kohezionin social, arsimin dhe përfshirjen e të rinjve, me synimin për të kundërshtuar forcat e përçarjes. Përmes nismave të tilla, mund të promovojmë qëndrueshmëri ekonomike, të ndërtojmë ura mes komuniteteve dhe të forcojmë demokracinë.
Vizionin që ndajmë me Evropën është i qartë: mbrojtja e të drejtave të njeriut, ruajtja e vlerave dhe përparimi i një të ardhmeje gjeopolitikisht të qëndrueshme dhe gjithëpërfshirëse. Së bashku, mund të ndriçojmë një dritë që çarmatos ekstremizmin, jo vetëm në Ballkan, por në të gjithë Azinë Qendrore, Lindjen e Mesme dhe më gjerë.
Ky moment kërkon veprime vendimtare. Ndërsa përballemi me këto kohë të pasigurta, duhet të vendosim: a do të mbrojmë idealet e demokracisë, paqes dhe unitetit, apo do të dorëzohemi përballë frikës dhe ndarjes? Le të kujtojmë vizionin e etërve themelues të Evropës – Spinelli, Schuman – dhe figurave bashkëkohore si Sassoli. Së bashku, mund të ndërtojmë një të ardhme ku vlerat evropiane janë një fanar për botën.
Në këtë frymë, i bëj thirrje të gjithë liderëve fetarë dhe politikë këtu sot që të bashkojnë forcat. Le të ndërtojmë jo mure përjashtimi, por fortifikata kundër ekstremizmit, luftës dhe radikalizmit. Le të shërbejnë përpjekjet tona të përbashkëta si një dëshmi e fuqisë së qëndrueshme të besimit dhe e forcës së vlerave evropiane. Faleminderit.”
