Më 14 maj, në përvjetorin e 165-të të themelimit të Teqesë së Alipostivanit në Përmet, u mblodhën si çdo vit besimtarë bektashianë dhe miq të tyre nga e gjithë Shqipëria dhe diaspora. Ky pelegrinazh tradicional vijon të jetë një pikë e rëndësishme shpirtërore për ndjekësit e bektashizmit, duke ruajtur me përkushtim një trashëgimi të lashtë fetare dhe kulturore.
Teqeja, e vendosur në një kodër piktoreske që mbikëqyr luginën e Vjosës dhe malin e Nemërçkës, në fshatin Alipostivan të Njësisë Administrative Qendër Piskovë, është themeluar në vitin 1900, por gojëdhënat e hershme dhe objektet arkeologjike të zbuluara në zonë dëshmojnë për një histori shumë më të hershme të këtij vendi si qendër banimi dhe besimi. Rruga me kalldrëm që dikur lidhte luginën e Osumit me Përmetin dhe Greqinë kalonte pikërisht këtu, duke e bërë këtë vend strategjik dhe të shenjtë.
Historia e teqesë lidhet ngushtë me figurën e misionarit të parë, baba Aliu, që solli dhe përhapi bektashizmin në këtë zonë, dhe më vonë me themeluesin zyrtar, Abdullah Babain. Teqeja ishte nën varësinë e Gjyshatës së Gjirokastrës dhe sot i përket juridiksionit të Gjyshatës së Beratit. Ndër vite, kanë shërbyer figura të njohura të bektashizmit si baba Meleqi, baba Hyseni, baba Hajdari, baba Nazifi dhe shumë të tjerë, të cilët kanë luajtur një rol të rëndësishëm në përhapjen e fesë në zonën e Dëshnicës dhe Skraparit.
Teqeja është dëshmitare e ngjarjeve të rëndësishme historike dhe kulturore, përfshirë mbështetjen për lëvizjet për gjuhën shqipe në fillimshekullin XX. E djegur nga andartët grekë në vitin 1914, ajo u rindërtua në vitin 1920. Më pas, u mbyll nga regjimi komunist në vitin 1967 dhe u rihap në maj të vitit 2003, e rindërtuar nga themelet me përkushtimin e baba Hekuran Nikollarit.
Sot, Teqeja e Alipostivanit, me ndërtesën e saj të re dhe mjediset karakteristike bektashiane, është jo vetëm një qendër shpirtërore, por edhe një atraksion i veçantë natyror dhe kulturor në luginën e Vjosës. Me gjelbërim përreth, tyrbe dhe histori të pasur, ajo mbetet një nga perlave e trashëgimisë bektashiane në Shqipëri.
