Në një ngjarje me rëndësi të veçantë diplomatike dhe historike për Shqipërinë, Kryegjyshi Botëror i Bektashinjve, Haxhi Dede Baba, Edmond Brahimaj, ishte i ftuar nderi në darkën shtetërore të organizuar nga Kryeministri i Shqipërisë, z. Edi Rama, dhe bashkëshortja e tij, znj. Linda Rama, për të mirëpritur Presidentin e Republikës Franceze, Sh.T.Z. Emmanuel Macron, dhe Zonjën e Parë, znj. Brigitte Macron. Ceremonia u mbajt në ambientet e Pallatit të Brigadave në Tiranë, një ndër hapësirat më përfaqësuese të protokollit shtetëror shqiptar.
Kjo darkë shtetërore u zhvillua në kuadër të Samitit të VI të Komunitetit Politik Europian, që mblodhi në Tiranë liderët më të rëndësishëm të kontinentit, duke shënuar një moment historik për rolin e Shqipërisë në arenën ndërkombëtare dhe për konsolidimin e bashkëpunimit politik, ekonomik dhe kulturor me vendet anëtare të Bashkimit Europian.
Prania e Haxhi Dede Edmond Brahimajt në këtë aktivitet shtetëror të nivelit të lartë është një dëshmi e vlerësimit të lartë që i bëhet komunitetit bektashian në Shqipëri dhe në mbarë botën, si një faktor i rëndësishëm i paqes, tolerancës ndërfetare dhe bashkëjetesës harmonike mes besimeve. Si udhëheqës shpirtëror i një tradite të thellë dhe me rrënjë të lashta në kulturën shqiptare, pjesëmarrja e tij përbën një simbol të përfshirjes dhe unitetit në momentet kyçe të shtetit shqiptar.
Në këtë mbrëmje të veçantë, përveç Kryegjyshit Botëror, ishin të pranishëm figura të larta të politikës shqiptare dhe europiane, përfaqësues të trupit diplomatik, personalitete të kulturës dhe artit, si dhe drejtues të komuniteteve fetare në vend. Atmosfera festive dhe diplomatike theksoi rëndësinë që Shqipëria i kushton dialogut ndërkombëtar, forcimit të marrëdhënieve me partnerët strategjikë dhe ruajtjes së identitetit të saj unik të tolerancës dhe bashkëjetesës fetare.
Kjo ngjarje përforcon më tej misionin që Bektashizmi ka ndërmarrë prej kohësh: promovimin e paqes, dashurisë dhe harmonisë, jo vetëm brenda kufijve kombëtarë, por edhe në bashkësinë ndërkombëtare. Përfshirja e liderëve shpirtërorë në aktivitete të këtij niveli dëshmon për një shoqëri gjithnjë e më të hapur, përfshirëse dhe të angazhuar në ndërtimin e një Europe më të bashkuar dhe më të drejtë.
Përgatiti: Xh. CULLHAJ
