Kryegjyshi Botëror i Bektashinjve, Shenjtëria e Tij, Haxhi Dede Baba Edmond Brahimaj, ka dhënë mbështetjen e tij për protestën që do të mbahet këtë të premte, më 17 tetor, në Tiranë, në orën 17:00. Protesta ka për qëllim të kërkojë një gjykim të drejtë në Hagë për ish-krerët e Ushtrisë Çlirimtare të Kosovës (UÇK).
Ngjarja do të shërbejë si thirrje për drejtësi dhe për të mbështetur të akuzuarit në Dhomat e Specializuara në Hagë, ku po gjykohen ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi. Ata akuzohen për krime lufte dhe krime kundër njerëzimit, akuza të cilat ata i kanë mohuar kategorikisht.
Protesta në Tiranë pason një ngjarje të ngjashme që u zhvillua më 14 shtator në Hagë, ku qytetarë dhe organizata u mblodhën për të shprehur mbështetjen ndaj ish-krerëve të UÇK-së.
Kryegjyshata Bektashiane u bën thirrje qytetarëve të bashkohen në këtë protestë paqësore dhe të kërkojnë drejtësi të barabartë për të gjithë.