Shqipëria njihet prej kohësh si një shembull unik i harmonisë dhe bashkëjetesës ndërmjet feve të ndryshme. Kjo vlerë e rrallë kombëtare, e trashëguar brez pas brezi, përbën një nga shtyllat më të forta të identitetit dhe kulturës sonë europiane. Në këtë frymë mirëkuptimi e respekti të ndërsjellë, deputeti Taulant Balla zhvilloi një takim me drejtuesit e komuniteteve fetare në vend, ku u diskutuan çështje të rëndësishme që lidhen me mbështetjen institucionale, veprimtaritë edukative, si dhe problematikat e pronave të institucioneve fetare.
Fjala e deputetit Taulant Balla:
“Shqipëria është një shembull unik i bashkëjetesës ndërfetare. Myslimanë, katolikë, ortodoksë, bektashinj dhe ungjillorë jetojnë në respekt të ndërsjellë, duke ndarë vlera të përbashkëta si paqja, dashuria, solidariteti dhe institucioni i familjes. Kjo harmoni fetare është pasuri kombëtare dhe dëshmi e identitetit tonë europian. Gjithmonë i nderuar të takohem me drejtuesit e komuniteteve fetare, për të diskutuar mbi nevojat për mbështetje nga buxheti i shtetit për veprimtaritë e tyre edukative, çështjet dhe problematikat e pronave të institucioneve fetare dhe mbi disa akte ligjore të cilat po diskutohen në Kuvendin e Shqipërisë. Thellësisht mirënjohës për udhëheqësinë e tyre të mençur.
‘Feja e shqiptarit është shqiptaria.’
Ky takim nënvizoi edhe një herë rëndësinë e dialogut dhe bashkëpunimit ndërmjet shtetit dhe institucioneve fetare, si garanci për forcimin e vlerave të paqes, tolerancës dhe unitetit kombëtar.