Ditën e premte, 6 shkurt 2026, në Teqenë e bekuar të Alipostivanit, Përmet, në kuadër të përkujtimit të njëvjetorit të kalimit në amshim të Baba Hekuran Nikollarit, u zhvillua ceremonia fetare përkujtimore, kushtuar jetës dhe veprës së një prej figurave të nderuara të klerit bektashian.
Në këtë moment reflektimi dhe lutjeje, në praninë e klerikëve dhe besimtarëve, Kryegjyshi Botëror i Bektashinjve mbajti fjalimin përkujtimor, duke sjellë në kujtesën e besimtarëve figurën e Baba Hekuran Nikollarit si një udhërrëfyes shpirtëror, shërbestar të përkushtuar të Zotit dhe njeriut, dhe shembull të gjallë të vlerave të urtësisë, dashurisë dhe devotshmërisë bektashiane.
Fjala e Kryegjyshit Botëror, Dede Edmond Brahimaj:
“Bismilahi Rrahmani Rrahim!
Në emër të Zotit , Fuqimadh e mëshirëshumë!
Të dashur besimtarë, motra dhe vëllezër në besim,
Të nderuar Baballarë, dervishë, besimtarë, miq dhe dashamirës të rrugës së shenjtë bektashiane,
Sot jemi mbledhur me zemra të përulura dhe me shpirt të ndriçuar nga kujtimi, për të përkujtuar një vit nga kalimi në amshim i Baba Hekuran Nikollarit – një udhërrëfyes shpirtëror, një shërbestar i përkushtuar i Zotit dhe i njerëzimit, një njeri që jetoi me besim, urtësi dhe dashuri.
Kalimi i tij nga kjo botë nuk ishte fund, por një udhëtim drejt përjetësisë. Në traditën tonë bektashiane, vdekja nuk është ndarje, por bashkim me të Vërtetën hyjnore. Baba Hekurani jetoi ashtu siç mësoi: me thjeshtësi, me përkushtim dhe me një zemër gjithmonë të hapur për çdo njeri, pa dallim.
Ai ishte shembull i gjallë i parimit të shenjtë:
“Paçim dashuri për njeriun, se aty gjendet Zoti.”
Fjala e tij ishte e qetë, por e thellë; këshilla e tij e butë, por e fortë; prania e tij sillte paqe dhe besim. Ai nuk predikoi vetëm me fjalë, por mbi të gjitha me vepra.
Kontributi i tij në edukimin shpirtëror ishte i jashtëzakonshëm. Baba Hekurani nuk u ndal vetëm tek përkujtimi i ritualeve të bektashizmit; ai investoi në rritjen dhe udhëheqjen e dervishëve, myhybëve, besimtarëve, duke i mësuar të jetojnë me devotshmëri, të përhapin dashurinë dhe respektin për të gjithë njerëzit dhe të ruajnë traditën e pasur shpirtërore të tarikatit tonë. Teqeja e Alipostivanit , ku ai kaloi shumë vite në udhëheqje dhe shërbim, ishte gjithmonë një vend i hapur për mësim dhe udhëzim, ku çdo besimtar ndjente ngrohtësinë dhe dritën shpirtërore që shfaqej nga prania e tij.
Përhapja e besimit dhe vlerave bektashiane ishte një mision i vazhdueshëm i Baba Hekuran Nikollarit. Ai e kuptoi se feja jonë nuk është vetëm për brenda mureve të teqesë, por duhet të jetojë në çdo veprim të përditshëm. Përmes shembullit të tij personal, përmes fjalëve ai arriti të prekte zemrat e shumë njerëzve, duke rritur ndërgjegjësimin shpirtëror dhe përhapur mesazhin e paqes, dashurisë dhe harmonisë mes njerëzve. Shumë brezave ai i shërbeu si udhërrëfyes , duke i frymëzuar të qëndrojnë të përkushtuar ndaj rrugës së shenjtë dhe të jetojnë jetën me devotshmëri dhe drejtësi.
Veprat e Baba Hekuran Nikollarit mbeten të gjalla mes nesh: në shërbimin ndaj komunitetit, në përkushtimin ndaj besimit, në edukimin shpirtëror të brezave, dhe në shembullin e jetës së ndershme e të përulur.
Sot, me mirënjohje të thellë, e falënderojmë për gjithçka la pas: për dritën që ndezi në zemrat e besimtarëve, për durimin me të cilin na udhëzoi, për lutjet ndaj njerëzimit dhe për paqen që përhapi me praninë e tij. Le të jetë ky përkujtim jo vetëm një moment mirënjohje për veprën e tij, por edhe një thirrje për vazhdimësi: që vlerat që ai mishëroi – dashurinë, tolerancën, urtësinë dhe shërbimin – t’i mbajmë gjallë në jetën tonë të përditshme.
I lutemi Zotit të Madhërishëm që shpirti i Baba Hekuran Nikollarit të prehet në paqe, në dritën e së Vërtetës, pranë shpirtrave të pastër dhe të zgjedhur.
Lavdi veprës së tij. I përjetshëm qoftë kujtimi i Baba Hekuran Nikollarit. Dritë i pastë shpirti.
Zoti na bekoftë të gjithëve! Amin! ”
Përkujtimi i një viti nga kalimi në amshim i Baba Hekuran Nikollarit u zhvillua në një frymë përulësie, mirënjohjeje dhe lutjeje, duke riafirmuar rëndësinë e trashëgimisë shpirtërore dhe amanetit fetar që ai la pas komunitetit bektashian.
Kryegjyshata Botërore Bektashiane përkulet me respekt para jetës dhe veprës së tij dhe shpreh mirënjohje të thellë për kontributin e çmuar në shërbim të besimit, paqes shpirtërore dhe harmonisë njerëzore. Kujtimi i Baba Hekuran Nikollarit do të mbetet i gjallë në zemrat e besimtarëve dhe në historinë shpirtërore të tarikatit bektashian, si një udhërrëfyes i përjetshëm i dashurisë dhe i së Vërtetës.
