Me ndjenjë të thellë respekti dhe përulësie, njoftohen të gjithë besimtarët dhe dashamirësit e rrugës bektashiane se më datë 4 prill, ora 11:00, në Selinë e Shenjtë të Kryegjyshatës Botërore Bektashiane (Godina Multifunksionale “Odeon”), do të zhvillohet Mevludi përkujtimor në nderim të 15-vjetorit të kalimit në amshim të ish Kryegjyshit Botëror të Bektashinjve, Haxhi Dede Baba Reshat Bardhi.
Kjo ceremoni shpirtërore është një moment i veçantë reflektimi, mirënjohjeje dhe lutjeje, ku përkujtohet jeta, vepra dhe kontributi i vyer i një figure të ndritur që i shërbeu me devocion të lartë besimit, kombit dhe vlerave njerëzore. Trashëgimia e tij mbetet një udhërrëfyes i çmuar për brezat, duke frymëzuar rrugën e dashurisë, paqes dhe unitetit.
Mevludi do të drejtohet nga Kryegjyshi Botëror i Bektashinjve, Haxhi Dede Baba Edmond Brahimaj, i cili përmes fjalës dhe lutjes do të përcjellë mesazhe besimi, harmonie dhe përkushtimi shpirtëror.
Ftohen të gjithë besimtarët të marrin pjesë në këtë ceremoni të shenjtë fetare , për të ndarë së bashku kujtesën, lutjen dhe nderimin për këtë figurë të shquar të bektashizmit.