Sot, Kryetari i Grupit Parlamentar të Lëvizjes VETËVENDOSJE!, Rexhep Selimi, së bashku me deputeten Fjolla Ujkani dhe këshilltarin e grupit parlamentar Salih Hoxha priti në takim Kryegjyshin Botëror të Bektashinjve, Kryeshenjtërinë e tij, Haxhi Dede Edmond Brahimajn, Kryetarin e Gjyshatës së Kosovës, Mumin Lamajn, dhe kreun e Marrëdhënieve me Jashtë të Kryegjyshatës Botërore Bektashiane, Arben Sulejmanin.
Në këtë takim miqësor u fol për ligjin që ka të bëjë me Liritë Fetare dhe sfidat për miratimin e tij, me ç’rast Selimi ia bëri të ditur Kryegjyshit Botëror, qëndrimin e Lëvizjes VETËVENDOSJE! që përkrahë njohjen e komunitetit Bektashi në Republikën tonë. Komuniteti Bektashi në Kosovë ekziston ndër shekuj, dhe ka bashkëvepruar e kontribuar në krijimin e një të ardhme më të mirë në vend. Si i tillë, ky komunitet duhet t’i gëzojë edhe të drejtat që i gëzojnë komunitetet tjera fetare të njohura sipas ligjit në Kosovë, gjithmonë në respektim të ligjit dhe Kushtetutës së vendit, tha Selimi, i cili e falënderoi Kryegjyshin Botëror të Bektashinjve për vizitën.
