Në një ditë plot solemnitet dhe emocion, më 7 shtator 2025, teqja e Alipostivanit në Përmet u kthye në qendër pelegrinazhi dhe bashkimi shpirtëror. Qindra besimtarë, klerikë dhe dashamirës të bektashizmit u mblodhën për të marrë pjesë në inaugurimin e bustit të Baba Hekuran Nikollarit, një prej figurave më të ndritura të historisë dhe traditës bektashiane shqiptare.
Kjo ngjarje e shënuar u organizua nga Kryegjyshata Botërore e Bektashinjve, në bashkëpunim me Teqenë e Alipostivanit, duke shënuar një moment të rëndësishëm për kujtesën shpirtërore dhe identitetin kulturor të vendit.
Në këtë ceremoni madhështore mori pjesë edhe Kryegjyshi Botëror i Bektashinjve, Shenjtëria e Tij, Haxhi Dede Baba Edmond Brahimaj, i cili mbajti një fjalë prekëse dhe të ngrohtë. Ai theksoi se figura e Baba Hekuranit është e ngulitur thellë në historinë e bektashizmit si shembull i përkushtimit dhe i dashurisë pa kushte për njeriun.
“Baba Hekurani ishte një ndër gurët e çmuar të traditës sonë, i cili me shembullin e tij na mëson se besimi dhe dashuria për njeriun janë udhëzime që nuk shuajnë kurrë,” – tha Kryegjyshi, duke shtuar se vepra e tij nuk kufizohet vetëm në shërbesën fetare, por edhe në forcimin e harmonisë, të paqes dhe të bashkëjetesës mes njerëzve. “Ai ishte një shpirt i madh që i dha dritë kohës së vet, një udhërrëfyes i vërtetë për të gjithë ata që besojnë te forca e mirësisë. Sot, busti i tij në Alipostivan nuk është thjesht një monument bronzi, por një thirrje e përhershme që secili prej nesh të mbjellë dashuri, të punojë për pajtim dhe të ecë në rrugën e shenjtë të humanizmit.”
Në krah të tij, me një fjalë të veçantë, foli edhe Kryetarja e Bashkisë Përmet, znj. Alma Hoxha, e cila theksoi rëndësinë e këtij momenti për zonën dhe për Shqipërinë. “Ky është një moment krenarie për Përmetin dhe për të gjithë vendin. Figura e Baba Hekuranit mbetet një pikë reference e fuqishme për brezat, duke na kujtuar se dashuria, humanizmi dhe sakrifica janë themele të forta të identitetit tonë,” u shpreh ajo.
Atmosfera e ngrohtë dhe solemne u pasurua me ilahi, lutje dhe mesazhe shpirtërore që ngritën lart kujtimin e Baba Hekuranit. Emocioni i besimtarëve u përjetua si një moment i shenjtë bashkimi dhe mirënjohjeje për një jetë të vendosur në shërbim të njeriut dhe të Zotit.
Busti i vendosur në qendër të Alipostivanit nuk është thjesht një monument artistik, por një kujtesë e përhershme për figurën e Baba Hekuranit, i cili përmes jetës së tij u bë simbol i besimit, i përkushtimit dhe i dashurisë universale
Në fund të ceremonisë, të gjithë të pranishmit u pajtuan se kjo ditë nuk ishte vetëm një homazh për një figurë të shquar, por edhe një thirrje frymëzuese për të ardhmen. Në Alipostivan, sot më shumë se kurrë, u ringjall mesazhi i fortë i dashurisë, i unitetit dhe i humanizmit që Baba Hekurani la si trashëgimi të pavdekshme.
Pergatiti: Xh. CULLHAJ
