Mes duartrokitjeve, nderimeve dhe përkuljeve para arkëmortit të tij, Ismail Kadare është përcjellë sot, 3 korrik 2024, për në banesën e fundit, me nderime dhe ceremoni shtetërore. Kolosi i letërsisë shqipe bëri bashkë të gjithë shqiptarët jo vetëm në Shqipëri por edhe në Kosovë dhe Maqedoninë e Veriut, ku zhvilluan homazhe në ambientet e Teatrit Kombëtar të Operës e Baletit dhe lanë mesazhet e tyre në librin e kujtimeve.
Në hyrje të Teatrit Kombëtar të Operës dhe Baletit ishte vendosur edhe një stendë me veprat e të ndjerit Kadare të përkthyer në 45 gjuhë të botës.
Në mesin e shumë udhëheqësve të lartë dhe qytetarë të shumtë nga vende të ndryshme, në këto homazhe mori pjesë dhe la mesazhin e tij në librin e kujtimeve edhe Kryegjyshi Botëror Bektashian, Shenjtëria e Tij, Haxhi Dede Baba, Edmond Brahimaj pranë arkivolit të romancierit dhe dramaturgut shqiptar Ismail Kadare, i cili vdiq në moshën 88-vjeçare.
Të pranishëm në homazhe ishin gjithashtu edhe diplomatë të huaj në vendin tonë, ku përmes kurorave me lule dhe mesazheve të lëna në librin e kujtimeve kanë nderuar shkrimtarin Ismail Kadare që nuk i përkiste vetëm Shqipërisë por botës.
Përgatiti: Xh. ÇULLHAJ
