Ditën e premte, 12 shtator 2025, në Tiranë u zhvillua seanca e parë plenare e legjislaturës së XI të Kuvendit të Republikës së Shqipërisë, një moment i rëndësishëm që shënoi nisjen zyrtare të punimeve të Parlamentit të ri.
Me ftesë të posaçme, mes të ftuarve të nderuar ishte i pranishëm edhe Kryegjyshi Botëror i Bektashinjve, Shenjtëria e Tij, Haxhi Dede Baba Edmond Brahimaj, duke i dhënë këtij solemniteti një dimension më të gjerë përfaqësimi shoqëror dhe shpirtëror.
Seanca nisi me paraqitjen e raportit të Komisionit të Përkohshëm për Verifikimin e Mandateve, i cili shqyrtoi vlefshmërinë ligjore të deputetëve të sapozgjedhur. Pas miratimit të raportit, deputetët e rinj kryen betimin solemn, duke marrë zyrtarisht mandatin e tyre përfaqësues.
Në vijim, një nga momentet kryesore të rendit të ditës ishte procesi për zgjedhjen e Kryetarit të ri të Kuvendit, ku shumica parlamentare paraqiti kandidaturën e z. Niko Peleshi.
Prania e Kryegjyshit Botëror në këtë ngjarje madhore politike dhe institucionale është një dëshmi e qartë e rolit të rëndësishëm që ka komuniteti bektashian në shoqërinë shqiptare, por edhe e respektit të ndërsjellë që ekziston midis institucioneve fetare dhe atyre shtetërore.
Ky moment përforcon vlerat e bashkëjetesës dhe harmonisë ndërfetare, që prej shekujsh kanë qenë një pasuri e veçantë e traditës shqiptare, duke dhënë një shembull të rrallë uniteti dhe mirëkuptimi.
