Një delegacion nga Zyra Ndërkombëtare për Lirinë e Besimit (IRF) në Departamentin e Shtetit, SHBA, i përbërë nga z. Michael Dozler, Shefi i Njësisë për Europën në Zyrën IRF dhe znj. Sonia Fernandes, Zyrtare Politikash, zhvilluan një vizitë në Kryegjyshatën Botërore Bektashiane.
Gjatë kësaj vizite, delegacioni i shoqëruar nga znj. Amelia Hintzen dhe znj. Irena Taga përfaqësuese të ambasadës së SHBA-së në Tiranë, u prit edhe nga Kryegjyshi Botëror Bektashian, Shenjtëria e Tij, Haxhi Dede Baba, Edmond Brahimaj.
Në këtë takim u diskutua rreth çështjeve të rëndësishme, që lidhen me lirinë e besimit dhe dialogun ndërfetar në Shqipëri, ku përfaqësuesit e IRF-së shprehën interesin e tyre për të mësuar më shumë rreth aktiviteteve dhe nismave të Selisë së Shenjtë Bektashiane në promovimin e harmonisë ndërfetare dhe respektit reciprok ndërmjet bashkësive të ndryshme fetare në Shqipëri.
Biseda vijoi me një shpjegim të historikut të bektashizmit dhe u përmbyll me një vizitë në ambientet e muzeut, arkivit, zyrës së regjistrimit të besimtarëve, biblioteka etj.
Në fund takimi u përmbyll me disa dhurata, botime, albume dhe libra të Selisë së Shenjtë.
