Në një atmosferë përkujtimi dhe reflektimi shpirtëror, në Bllacë u zhvillua ceremonia përkujtimore me rastin e 40-ditëve të kalimit nga jeta të klerikut të nderuar bektashian, Baba Halil Curri. Në këtë aktivitet morën pjesë besimtarë, familjarë, miq dhe përfaqësues të komunitetit, të cilët u mblodhën për të nderuar jetën dhe veprën e tij në shërbim të besimit dhe të komunitetit.
Me këtë rast, Kryegjyshi Botëror i Bektashinjve, Haxhi Dede Baba Edmond Brahimaj, mbajti një fjalim përkujtimor ku vlerësoi figurën dhe kontributin e Baba Halil Currit, duke theksuar përkushtimin e tij të palodhur ndaj besimit Bektashian, shërbimit ndaj njerëzve dhe ruajtjes së traditës shpirtërore në zonat ku ai shërbeu.
Fjala e Kryegjyshit Botëror, Dede Edmond Brahimaj.
” Të nderuar motra dhe vëllezër, familjarë , besimtarë të devotshëm të Baba Halil Currit.
Sot jemi mbledhur për të përkujtuar 40 ditët e kalimit nga jeta të babait tonë të ndritur, Baba Halil Curri. Ky është një moment i veçantë për të reflektuar mbi jetën, veprën dhe përkushtimin e tij të jashtëzakonshëm ndaj Zotit, komunitetit dhe besimit Bektashian.
Baba Halil Curri, gjatë jetës së tij, ishte shembull i devotshmërisë, i diturisë dhe i shërbimit të palodhur për komunitetin. Ai ka qenë klerik që mbajti gjallë traditat Bektashiane, duke ecur gjithmonë me pasion në rrugën e dijes dhe të moralit, duke udhëzuar besimtarët në rrugën e devotshmërisë dhe të dashurisë ndaj Zotit dhe njerëzve. Veprimtaria e tij në zonat ku ka shërbyer, duke përfshirë Martaneshin, Bllacën, Dibrën dhe Fushë-Krujën, ka lënë gjurmë të thella shpirtërore dhe ka forcuar lidhjet e komunitetit Bektashi.
Si klerik e shërbëtor i denjë i besimit, Baba Halili ishte gjithmonë pranë të varfërve, dhe çdo besimtari që kërkonte udhëzim shpirtëror. Ai e konsideronte çdo veprim si shërbim ndaj Zotit dhe si mundësi për të forcuar besimin, duke përhapur mesazhet e paqes, durimit dhe mirëdashjes. Përmes shembullit të tij, ai na mëson se devotshmëria nuk është vetëm lutje dhe adhurim, por edhe veprim dhe shërbim i përditshëm për të tjerët.
Siç thotë Haxhi Bektashi, “Me sytë e ballit shikon krijesat, me sytë e zemrës shikon Krijuesin.” Ky është mësimi që na jep frymë dhe udhëzim për jetën tonë shpirtërore. Baba Halil Curri e ka jetuar këtë parim në çdo veprim të tij: ai shikonte nevojat e njerëzve me syrin e dhembshurisë dhe përkushtimit, ndërsa çdo veprim e lidhi me Zotin dhe devotshmërinë e tij të thellë.
Përmes shembullit të tij, ne kuptojmë se shërbimi ndaj komunitetit nuk është thjesht ndihmë materiale, por është një mënyrë për të parë Krijuesin në çdo krijesë, për të ushqyer dashurinë dhe respektin për njerëzit dhe për të forcuar lidhjen tonë shpirtërore me Zotin.
Sot në përkujtim të Tij, ky mësim bëhet edhe më i fuqishëm: të kujtojmë Baba Halilin duke reflektuar mbi jetën tonë, duke i shërbyer të tjerëve dhe duke e ushqyer shpirtin me devotshmëri dhe dashuri, ashtu si ai e jetoi çdo ditë.
Le të mbajmë gjallë kujtimin e tij në veprat tona, në respektin ndaj traditës dhe në shërbim të komunitetit. Zoti i Madhërishëm qoftë me të dhe mëshiroftë , dhe shqirti i Tij u prehtë në paqe!
Zoti na bekoftë të gjithëve! Amin! ”
Në përfundim të ceremonisë, besimtarët dhe të pranishmit u bashkuan në lutje për shpirtin e Baba Halil Currit, duke kujtuar me respekt dhe mirënjohje jetën e tij të përkushtuar në shërbim të Zotit dhe të komunitetit. Figura e tij mbetet një shembull i devotshmërisë, përulësisë dhe dashurisë ndaj njerëzve.
Kryegjyshata Botërore Bektashiane shpreh mirënjohjen dhe respektin e saj për kontributin e Baba Halil Currit dhe vlerëson trashëgiminë shpirtërore që ai la pas në komunitetin bektashian. Kujtimi i tij do të mbetet i gjallë në zemrat e besimtarëve dhe në historinë e shërbimit të përkushtuar ndaj besimit Bektashian.
