Ditën e martë, 5 maj 2026, në ambientet e Selisë së Shenjtë të Kryegjyshatës Botërore Bektashiane u zhvillua një takim kortezie ndërmjet Kryegjyshit Botëror të Bektashinjve, Shenjtërisë së Tij, Dede Baba Edmond Brahimaj, dhe shkrimtares së njohur ndërkombëtare, znj. Natalie Claire.
Takimi u zhvillua në një atmosferë të ngrohtë dhe miqësore, në frymën e dialogut, mirëkuptimit dhe bashkëpunimit kulturor e shpirtëror. Gjatë bisedës, u trajtuan tema me interes të përbashkët që lidhen me rolin e besimit në shoqërinë bashkëkohore, rëndësinë e ruajtjes së trashëgimisë shpirtërore dhe kulturore, si dhe promovimin e vlerave universale të paqes, tolerancës dhe bashkëjetesës ndërfetare.
Një vëmendje e veçantë iu kushtua librit të autores, “Shqipëria, vendi i Dervishëve”, i cili trajton historinë, filozofinë dhe dimensionin shpirtëror të traditës bektashiane në Shqipëri. Znj. Natalie Claire ndau me Kryegjyshin përvojat dhe përshtypjet e saj gjatë hulumtimeve në terren, duke vlerësuar mikpritjen, kulturën dhe besimin e komunitetit bektashian.
Nga ana e tij, Kryegjyshi Botëror vlerësoi kontributin e autores në prezantimin e vlerave autentike të bektashizmit për publikun ndërkombëtar, duke theksuar rëndësinë e botimeve të tilla në forcimin e dialogut ndërkulturor dhe ndërfetar. Ai shprehu gjithashtu gatishmërinë e Kryegjyshatës për të mbështetur nisma që promovojnë njohjen dhe studimin e trashëgimisë shpirtërore bektashiane.
Në përfundim të takimit, të dy palët shprehën dëshirën për të vijuar bashkëpunimin në të ardhmen, në funksion të promovimit të dialogut dhe shkëmbimit kulturor në nivel ndërkombëtar.
Ky takim përbën një tjetër hap të rëndësishëm në përpjekjet e Kryegjyshatës Botërore Bektashiane për forcimin e lidhjeve me personalitete të kulturës dhe letërsisë, si dhe për promovimin e vlerave të saj në arenën globale.
