Dita e shtunë, 22 gusht 2026, shënoi kulmin e festës tradicionale të pelegrinazhit pesëditor në teqenë e Kulmakut-Skrapar. Jo vetëm për pjesëmarrjen masive, porse në këtë ditë, në orën 11:00, nisi ceremonia zyrtare e kësaj feste bektashiane, e parapërgatitur në detaje, nën përkujdesjen e Kryegjyshit Botëror të Bektashinjve, Shenjtërinë e Tij, Haxhi, Dede Baba, Edmond Brahimaj.
Në këtë ceremoni merrnin pjesë si tradicionalisht, mijëra pelegrinë nga Shqipëria, hapësirat mbarë shqiptare, Kosova, Maqedonia e Veriut, shtete të ndryshme të Europës, nga SHBA, Kanadaja, Australia e largët e vende të tjera të botës. Merrnin pjesë gjithashtu klerikë bektashi, funksionarë shtetëror (Lirim Neziraj, nga Komiteti Shtetëror për Kultet) e vendorë, teologë, intelektualë të fushave të ndryshme e dashamirës. Mes miqve, ishte dhe Ali Kiliç, ish-Kryetar i Bashkisë së Maltepesë-Stamboll. Kjo ceremoni, ashtu si dhe ritet e tjera të këtyre ditëve, u zhvilluan në mjedise funksionale, falë punës së bërë nga Selia e Shenjtë Bektashiane e në veçanti, Gjyshata Bektashiane e Skraparit, në drejtimin e palodhur të sekretarit të saj, Zalo Qato.
Ceremonia, ashtu si dhe ritet e këtyre ditëve, u ndoq nga afër dhe u përcoll nga medie të shumta të vendit dhe nga bota.
Ceremonia ishte konceptuar dhe u realizua në formën e një spektakli, përgatitur nga gazetari i njohur, Ferdinand Samarxhi, ;Nderi i Kombit’, me interpretim të nefeseve bektashiane e valleve. Pas shoqërimit të Himnit Kombëtar dhe Himnit Baktashian nisi dhe ceremonia. Përmendim këtu moderatorin Dritan Boriçi, aktorin e njohur Bujar Asqeriu, këngëtari Kastriot Tusha, solistët A. Miraka & R. Kollogjeri, grupet e këngëve dhe valleve të Skraparit, Gramshit, ansamblit ‘Sadi Halili’ i Librazhdit, nga ansambli ‘Myzeqeja’ dhe Ansambli Shtetëror i Këngëve dhe Valleve të Shqipërisë.
Pranishmit, i përshëndeti Kryegjyshi Botëror i Bektashinjve, Haxhi Dede Edmond Brahimaj, i cili ndër të tjera tha: “….Bismilahi Rrahmani Rrahim! Në emër të Zotit, Mëshiruesit, Mëshirëbërësit! Të nderuar klerikë bektashinj, Të dashur besimtarë, pelegrinë dhe vizitorë! Të nderuar përfaqësues të institucioneve! Të dashura motra e të dashur vëllezër,
Të dashur shqiptarë kudo që ndodheni!
Sot, në këtë ditë të shenjtë, jemi mbledhur në Malin e Tomorrit, në këtë vend të bekuar ku prej brezash takohen besimi, historia, tradita dhe shpirti i shqiptarëve.
Mali i Tomorrit është një vend i shenjtë i besimit, i lutjes, i kujtesës dhe i shpresës. Për besimtarët, Tomorri është një vend ku njeriu i afrohet Zotit, ku zemra gjen qetësi dhe ku ndërgjegjja rikthehet te vlerat më të larta të jetës. Shenjtëria e këtij mali është përcjellë brez pas brezi dhe është bërë pjesë e pandarë e trashëgimisë shpirtërore dhe kulturore shqiptare.
Në këtë mal të lartë, pranë vendit të shenjtë të Abaz Aliut, mijëra besimtarë ngjiten çdo vit me zemër të hapur, me lutje dhe me shpresë. Ata sjellin këtu dashurinë për Zotin, për familjen, për kombin dhe për të mirën. Pranë Abaz Aliut, njeriu kujton se jeta është një udhëtim, se çdo ngjitje kërkon përpjekje dhe se çdo lartësi arrihet me besim, durim dhe sakrificë.
Pelegrinazhi i Abaz Aliut është një nga shprehjet më të rëndësishme dhe më të bukura të traditës sonë shpirtërore. Ai është një udhëtim i trupit, por mbi të gjitha është një udhëtim i shpirtit. Ngjitja drejt këtij mali simbolizon përpjekjen e njeriut për t’u ngritur mbi dobësitë e veta, mbi përçarjen, mbi egoizmin dhe mbi çdo pengesë që e largon nga e mira.
Emri dhe kujtimi i Abaz Aliut na sjellin përpara vlera të mëdha njerëzore e shpirtërore: sakrificën, besnikërinë, guximin, drejtësinë dhe mbrojtjen e së vërtetës. Këto janë vlera që nuk i përkasin vetëm një kohe apo një brezi. Janë vlera që duhet t’i ruajmë dhe t’ua përcjellim brezave që vijnë. Prandaj, pelegrinazhi ynë nuk duhet të jetë vetëm një traditë që përsëritet çdo vit. Ai duhet të jetë një moment reflektimi, pastrimi dhe ripërtëritjeje shpirtërore. Duhet të largohemi nga ky mal më të mirë, më të bashkuar, më të duruar dhe më të gatshëm për t’i shërbyer njëri-tjetrit. Sepse besimi merr kuptim kur shndërrohet në vepër. Lutja merr vlerë kur shoqërohet me dashuri. Besimi ndaj Zotit shprehet edhe në respektin ndaj njeriut, në ndihmën ndaj të dobëtit, në kujdesin për familjen dhe në përpjekjen për të ndërtuar një shoqëri më të drejtë, më njerëzore dhe më paqësore.
Të dashur besimtarë!
Një nga bukuritë më të mëdha të këtij pelegrinazhi është se këtu takohen njerëz të ndryshëm, nga qytete e krahina të ndryshme, nga trojet shqiptare dhe nga vende të ndryshme të botës.
Këtu na bashkon një gjë shumë më e madhe se dallimet tona: besimi në paqe, dashuria për njeriun dhe respekti për atë që është e shenjtë.
Pelegrinazhi i Abaz Aliut është gjithashtu një dëshmi e gjallë e një prej pasurive më të mëdha që ka Shqipëria: bashkëjetesës dhe harmonisë ndërfetare.
Ne kemi dëshmuar dhe duhet të vazhdojmë të dëshmojmë se besimi nuk është mur që ndan, por urë që bashkon; se ndryshimi nuk duhet të jetë shkak për përçarje, por një mundësi për të njohur dhe respektuar më shumë njëri-tjetrin.
Nga ky mal i shenjtë dëshiroj t’u drejtohem sot të gjithë shqiptarëve:
Të mos e humbim kurrë dashurinë për njëri-tjetrin.
Të mos lejojmë që dallimet politike, shoqërore, ekonomike apo të tjera të na bëjnë të harrojmë atë që na bashkon.
Të ruajmë familjen, respektin, fjalën e mirë dhe nderin.
Të kujdesemi për fëmijët tanë, për të moshuarit, për njerëzit në nevojë dhe për çdo njeri që kërkon ndihmën dhe dorën tonë.
Shqipëria ka nevojë për më shumë mirëkuptim, për më shumë dialog dhe për më shumë dashuri. Dhe besimi ynë duhet të jetë një forcë që ndërton ura, që afron zemrat dhe që i shërben paqes.
Një mesazh të veçantë kam sot për të gjithë besimtarët bektashinj kudo në botë:
Edhe nëse jeni larg Shqipërisë, larg Tomorrit dhe larg vendlindjes, zemra juaj është këtu. Kjo tokë, ky mal dhe kjo traditë janë pjesë e një trashëgimie shpirtërore që na lidh përtej kufijve.
Ruajeni besimin me urtësi.
Ruajeni traditën me dinjitet.
Ua përcillni brezave jo vetëm me fjalë, por mbi të gjitha me shembullin tuaj.
Kudo që të jetoni, bëhuni ambasadorë të paqes, të tolerancës, të dialogut dhe të dashurisë njerëzore.
Le të jetë Abaz Aliu një urë që bashkon, jo vetëm besimtarët bektashinj, por të gjithë njerëzit që besojnë te paqja, drejtësia, dinjiteti dhe dashuria.
Të nderuar të pranishëm,
Në këtë ditë të veçantë, dëshiroj të shpreh mirënjohjen time të thellë për të gjithë ju që ndodheni sot këtu.
Ju falënderoj për praninë tuaj, për besimin, për respektin ndaj këtij vendi të shenjtë dhe për dashurinë që tregoni ndaj traditës sonë. Falënderoj të gjithë pelegrinët që kanë ardhur nga qytete e fshatra të Shqipërisë, nga trojet shqiptare dhe nga vende të ndryshme të botës.
Një falënderim të veçantë u drejtoj klerikëve bektashinj, Gjyshatës Bektashiane të Skraparit, sekretarit z. Zalo Qato, autoriteteve vendore, strukturave të rendit dhe sigurisë, vullnetarëve, punonjësve dhe të gjithë atyre që kanë kontribuar me përkushtim dhe sakrificë që ky pelegrinazh të zhvillohet me dinjitet, paqe dhe mbarësi.
Qofshi të gjithë të bekuar për praninë, përkushtimin dhe dashurinë tuaj!
Në këtë vend të shenjtë, lutem që bekimi i Zotit të jetë mbi secilin prej jush dhe mbi familjet tuaja. U dhëntë Zoti shëndet të mirë, jetë të gjatë, paqe në zemër, harmoni në familje dhe mbarësi në çdo hap të jetës suaj.
U forcoftë besimi juaj.
U mbushtë çdo shtëpi me dritë, dashuri dhe begati.
U dhëntë Zoti begati fëmijëve tuaj dhe u udhëzoftë brezi i ri drejt dijes, urtësisë, mirësisë dhe respektit.
Të dashur motra e vëllezër!
Abaz Aliu na mëson se rruga drejt lartësisë kërkon sakrificë. Tomorri na kujton se për t’u ngritur shpirtërisht duhet të ecim së bashku.
Prandaj, le ta mbajmë këtë ditë në zemrat tona dhe le ta kthejmë këtë pelegrinazh në një premtim për më shumë mirësi, më shumë dashuri dhe më shumë paqe.
Zoti e bekoftë Shqipërinë!
Zoti i bekoftë shqiptarët kudo që janë!
Zoti i bekoftë të gjithë besimtarët bektashinj në mbarë botën!
Zoti i bekoftë familjet tuaja dhe të gjithë ju që ndodheni sot në këtë vend të shenjtë!
Zoti sjelltë paqe, mbarësi dhe begati në çdo shtëpi!
Me dashuri, me besim dhe me lutje, ju uroj të gjithëve një pelegrinazh të mbarë dhe të bekuar. Paqe në zemrat tuaja, dritë në familjet tuaja dhe bekime në çdo hap të jetës suaj.
Zoti qoftë me ju!
Amin!”
Shënim: Në vijim, do të japin informacione më të detajuar për ditët e pelegrinazhit në Malin e Tomorrit
