Gjyshata e Korçës, nën përkujdesjen e veçantë të Kryegjyshit Botëror Bektashian, Shenjtëria e Tij, Haxhi Dede Baba, Edmond Brahimaj, zhvilloi një ditë pelegrinazhi dhe përkujtimi në teqenë e Baba Kasëmit në fshatin Inonisht, Devoll. Ky ishte një moment i veçantë që bashkoi besimtarë dhe vizitorë nga vende të ndryshme, në një atmosferë shpirtërore dhe historike, duke kujtuar trashëgiminë dhe vlerat që ky vendbanim ka ruajtur shekuj me rradhë.
Historia e këtij vendi ka rrënjë të thella. Në vitin 1578, Kasëm Babai erdhi nga Kosturi së bashku me dervishët e tij dhe u vendos në Inonisht. Për nder të tij, komuniteti ngriti një tyrbe që sot është një vend me rëndësi të madhe shpirtërore dhe historike për besimtarët bektashianë dhe jo vetëm. Më vonë, në këtë vend u krijua edhe teqeja e Baba Kasëmit, e cila ka luajtur një rol të veçantë si qendër kulturore, atdhetare dhe fetare për gjithë rajonin.
Pelegrinazhi i sotëm nuk ishte vetëm një ritual fetar, por edhe një akt përkujtimi i trashëgimisë shpirtërore dhe historike të gjeneratave. Besimtarët morën pjesë në ceremoni me nderim dhe respekt, duke ndarë së bashku lutje, këngë dhe momente reflektimi. Ky aktivitet forcon lidhjen e komunitetit me rrënjët e tij dhe ruan gjallërinë e traditave bektashiane.
Ky është një shembull i qartë se si besimi, historia dhe kultura ndërthuren në një përvojë unike shpirtërore, që pasurohet çdo vit me ritin e pelegrinazhit dhe përkujtimeve. Gjyshata e Korçës dhe Kryegjyshi Botëror Bektashian vazhdojnë të jenë mbështetës të fuqishëm të ruajtjes së kësaj trashëgimie, duke i dhënë një dimension të veçantë identitetit dhe bashkimit shpirtëror të komunitetit.
Përgatiti: XH. CULLHAJ
