Ditën e diel, më 5 korrik 2026, në Teqenë e Shenjtë të Sari Salltikut në malin e Krujës u zhvillua ceremonia tradicionale e Ashures, një nga ngjarjet më të rëndësishme të kalendarit shpirtëror bektashian. Qindra besimtarë, pelegrinë dhe vizitorë nga Shqipëria dhe trojet shqiptare u ngjitën në këtë vend të shenjtë për të marrë pjesë në lutje, për të përfituar nga bekimet e kësaj dite të shënuar dhe për të ruajtur një traditë të trashëguar ndër breza.
Ceremonia u organizua nga Gjyshata Bektashiane e Krujës dhe u udhëhoq nga Kryegjyshi Botëror Bektashian, Shenjtëria e Tij, Haxhi Dede Baba Edmond Brahimaj, i cili, së bashku me klerikët bektashinj, zhvilloi ritet fetare dhe përcolli mesazhe paqeje, dashurie, harmonie dhe vëllazërimi.
Në fjalën e Tij përshëndetëse, Kryegjyshi Botëror theksoi rëndësinë shpirtërore të Ditës së Ashures, duke e cilësuar atë si një ditë reflektimi, sakrifice, solidariteti dhe shprese. Ai uroi të gjithë besimtarët për shëndet, begati dhe mbarësi në familjet e tyre, duke bërë thirrje për ruajtjen e vlerave njerëzore, respektit të ndërsjellë dhe bashkëjetesës në paqe.
Pas përfundimit të riteve fetare, sipas traditës shekullore bektashiane, u bë shpërndarja e Ashures për të gjithë të pranishmit, si simbol i bujarisë, bashkimit dhe mirësisë. Besimtarët vizituan gjithashtu shpellën e shenjtë të Sari Salltikut, ku u lutën për paqe, shëndet dhe mirësi, duke e bërë këtë pelegrinazh një përjetim të veçantë shpirtëror.
Ceremonia u zhvillua në një atmosferë të ngrohtë besimi dhe vëllazërie, duke dëshmuar edhe një herë rëndësinë që Teqeja e Sari Salltikut ka për besimtarët bektashinj dhe për trashëgiminë shpirtërore e kulturore të Shqipërisë.
