Ditën e sotme, 15 qershor 2026, në orën 14:00, komuniteti bektashian ka shënuar një nga momentet më të rëndësishme të kalendarit të tij shpirtëror. Në mjediset e Selisë së Shenjtë Bektashiane është zhvilluar ceremonia e “Nijetit të Matemit” , e cila zyrtarizon fillimin e ditëve të agjërimit, zisë dhe reflektimit të thellë për mbarë besimtarët.
Ritet e kësaj ceremonie të shenjtë u udhëhoqën dhe u drejtuan nga Kryegjyshi Botëror i Bektashinjve, Shenjtëria e Tij, Haxhi Dede Baba Edmond Brahimaj. Përmes lutjeve dhe leximeve tradicionale, Kryegjyshi Botëror u bëri thirrje besimtarëve për më shumë paqe, vëllazëri, solidaritet dhe përkushtim ndaj vlerave më të larta njerëzore.
Periudha e Matemit është një kohë zije dhe përkujtimi për dëshmorët e Qerbelasë, ku agjërimi dhe vetëpërmbajtja shërbejnë si një udhëtim shpirtëror për të pastruar shpirtin dhe për të kujtuar sakrificën e Imam Husejnit dhe familjes së tij në emër të së drejtës dhe të vërtetës.
Nijeti (synimi apo vendimi i brendshëm) i bërë sot nën drejtimin e Kryegjyshit Botëror hap zyrtarisht rrugën e këtij rrugëtimi shpirtëror, duke bashkuar besimtarët në lutje të përbashkëta për mbarësi, harmoni dhe dashuri midis njerëzve.
