Kryegjyshata Botërore Bektashiane, e udhëhequr nga parimet e paqes, dashurisë për njeriun dhe harmonisë shoqërore, shpreh shqetësimin për klimën e tensionuar në vend dhe u bën thirrje të gjithë qytetarëve dhe institucioneve që të veprojnë me urtësi, maturi dhe përgjegjësi.
Çdo shoqëri ka nevojë për dëgjimin e zërit të qytetarëve, për drejtësi dhe për institucione që përmbushin detyrimet e tyre me transparencë. Por po aq e rëndësishme është që pakënaqësitë dhe dallimet të mos shndërrohen në dhunë, urrejtje apo veprime që cenojnë sigurinë, pronën dhe dinjitetin e tjetrit.
U bëjmë thirrje drejtuesve të institucioneve, përfaqësuesve politikë dhe të gjithë protestuesve të kontribuojnë në uljen e tensioneve dhe në krijimin e hapësirave të mirëfillta për dialog. Përgjegjësia publike kërkon jo vetëm fjalë, por edhe veprime konkrete në shërbim të qytetarëve dhe të së ardhmes së vendit.
Në frymën e traditës bektashiane, që e vendos njeriun, dashurinë, tolerancën dhe respektin në themel të jetës, besojmë se asnjë mosmarrëveshje nuk duhet të jetë më e fortë se ndërgjegjja jonë dhe asnjë interes nuk duhet të qëndrojë mbi të mirën e përbashkët.
Shqipëria ka nevojë për qetësi, besim dhe bashkëpunim. Brezat e rinj meritojnë një shoqëri ku mendimi shprehet lirshëm, drejtësia kërkohet me dinjitet dhe konfliktet zgjidhen përmes dialogut.
Kryegjyshata Botërore Bektashiane fton çdo qytetar dhe institucion të bëhet pjesë e përpjekjes për një Shqipëri më të drejtë, më të bashkuar dhe më paqësore. Sepse përgjegjësia ndaj vendit fillon me respektin për njeriun dhe paqja ndërtohet nga secili prej nesh.
Kryegjyshata Botërore Bektashiane