Ditën e diel, 12 korrik 2026, në Teqenë e Shenjtë të Alipostivanit, në Përmet, u zhvillua ceremonia tradicionale e Ashures, një nga ngjarjet më të rëndësishme të kalendarit bektashian, e cila mblodhi besimtarë, pelegrinë dhe vizitorë të shumtë nga treva të ndryshme të vendit.
Në atmosferën e lutjes, paqes dhe përkushtimit shpirtëror, besimtarët morën pjesë në ceremonitë fetare të organizuara në këtë vend të shenjtë, duke nderuar kujtimin e Imam Hysejnit (a.s.) dhe martirëve të Qerbelasë. Gjatë ceremonisë u përcollën mesazhe për dashurinë ndaj Zotit, unitetin, sakrificën, drejtësinë dhe bashkëjetesën, vlera që përbëjnë themelin e besimit bektashian.
Pelegrinazhi në Teqenë e Alipostivanit është një traditë e ruajtur ndër breza dhe përfaqëson jo vetëm një akt të rëndësishëm besimi, por edhe një moment bashkimi për komunitetin. Në përfundim të ceremonisë, sipas traditës shekullore bektashiane, u shpërnda Ashurja për të gjithë të pranishmit, si simbol i mirësisë, begatisë dhe solidaritetit.
Teqeja e Alipostivanit, një nga qendrat e rëndësishme të bektashizmit në jug të Shqipërisë, vazhdon të mbetet një vatër e gjallë e besimit, kulturës dhe trashëgimisë shpirtërore, duke mirëpritur çdo vit qindra besimtarë në këtë ditë të shenjtë.
