Ditën e shtunë, 11 korrik 2026, në Teqenë e Shenjtë të Kuzum Babait në Vlorë u zhvillua ceremonia tradicionale e Ashures, duke mbledhur besimtarë bektashianë, pelegrinë dhe vizitorë të shumtë nga Vlora dhe mbarë vendi.
Ceremonia u drejtua nga Kryegjyshi Botëror Bektashian, Shenjtëria e Tij, Haxhi Dede Baba Edmond Brahimaj, i cili përcolli mesazhe paqeje, dashurie, mirëkuptimi dhe bashkëjetese, duke theksuar rëndësinë e ruajtjes së vlerave shpirtërore dhe njerëzore që përfaqëson besimi bektashian.
Në këtë veprimtari morën pjesë përfaqësues të institucioneve shtetërore dhe vendore, personalitete të jetës publike, klerikë, si dhe qindra besimtarë, të cilët u bashkuan në lutje dhe përkujtim të kësaj dite të shenjtë.
Pas zhvillimit të riteve fetare, sipas traditës shekullore bektashiane, u shpërnda ashura, ëmbëlsira simbol e unitetit, mirësisë dhe solidaritetit, e cila përçon mesazhin e bashkimit të njerëzve përtej çdo dallimi.
Teqeja e Kuzum Babait, një nga vendet më të rëndësishme të kultit bektashian në jug të Shqipërisë, vijon të mbetet një qendër e rëndësishme pelegrinazhi, ku besimtarët gjejnë paqe shpirtërore dhe forcojnë lidhjen me traditën dhe vlerat e trashëguara ndër breza.
Ceremonia e Ashures në Kuzum Baba dëshmoi edhe një herë gjallërinë e traditës bektashiane dhe rëndësinë e saj në kultivimin e paqes, harmonisë, dashurisë njerëzore dhe respektit të ndërsjellë.
